பொருள்கோள் வரிஅமைப்பு:
அறனழீஇ அல்லவை செய்தலின் தீதே புறனழீஇப் பொய்த்து நகை.

பதவுரை: அறன்-நல்லன, நற்செய்கைகள்; அழீஇ-சிதைத்து; அல்லவை-தீயவை; செய்தலின்-செய்தலைக் காட்டிலும்; தீதே-கொடிதே; புறன்-புறத்தே, காணாதவிடம்; அழீஇ-அழித்துச் சொல்லி, இழித்துப் பேசி; பொய்த்து-பொய்பேசி, பொய்யாக; நகை-சிரிப்பு.

அறனழீஇ அல்லவை செய்தலின் தீதே:

இப்பகுதிக்குத் தொல்லாசிரியர்கள் உரைகள்:
மணக்குடவர்: அறத்தை யழித்து அறமல்லாதவற்றைச் செய்வதனினும் தீது;
பரிதி: தன்மத்தை அழித்துப் பாவத்தைச் செய்கிறதற்கு ஒக்கும்;
காலிங்கர்: ஒருவன் அறத்தினின்றும் நீங்கி, பாவங்களைச் செய்தலினும் சாலத் தீதே;
பரிமேலழகர்: அறன் என்பது ஒன்று இல்லை என அழித்துச் சொல்லி, அதன்மேல் பாவங்களைச் செய்தலினும் தீமையுடைத்து;

'அறத்தை யழித்து அறமல்லாதவற்றைச் செய்வதனினும் தீது' என்றபடி பழம் ஆசிரியர்கள் இப்பகுதிக்கு உரை நல்கினர். காலிங்கர் அறன்+நழீஇ எனப் பிரித்து அறத்தின் நீங்கி என உரை கூறினார்.

இன்றைய ஆசிரியர்கள் 'அறமாயினவற்றை அழித்து இல்லை என்று சொல்லி அறமல்லாதவற்றை ஒருவன் செய்தலினும்', 'மற்ற தர்மங்களில் தவறி தர்மமல்லாத காரியங்களைச் செய்வதைக் காட்டிலும் பெரிய பாவம்', 'அறத்தைச் சிதைத்துத் தீயன செய்தலினும் இழிவானது', 'அறநெறிகளைக் கெடுத்துத் தீயனவற்றைச் செய்தலைவிட தீமையுடையது', என்ற பொருளில் இப்பகுதிக்கு உரை தந்தனர்.

அறநெறிகளிலிருந்து நீங்கித் தீயன செய்தலைவிடக் கொடியதே என்பது இப்பகுதியின் பொருள்.

புறனழீஇப் பொய்த்து நகை:

இப்பகுதிக்குத் தொல்லாசிரியர்கள் உரைகள்:
மணக்குடவர்: ஒருவனைக் காணாத விடத்து இழித்துரைத்துக் கண்டவிடத்துப் பொய் செய்து நகுதல்.
மணக்குடவர் குறிப்புரை: இது பாவத்தினும் மிகப் பாவமென்றது.
பரிதி: ஒருவன் குற்றத்தைப் புறங்கூறுதல் என்றவாறு.
காலிங்கர்: யாதோ எனில் முன்னம் ஒருவன் முன்பு தானுளனாகியபின் புறத்துப் போந்து தான் அவனை முன்னம் சொல்லும் முறையின்றி, சாலத் தப்பானவை சொல்லிப் பிறருடன் நகுகின்ற நகை என்றவாறு.
காலிங்கர் குறிப்புரை: தப்பு என்றது பொய் என அறிக.
பரிமேலழகர்: ஒருவனைக் காணாதவழி இகழ்ந்துரையால் அழித்துச் சொல்லிக் கண்டவழி அவனோடு பொய்த்து நகுதல். [பொய்த்து நகுதல்-பொய்யாக நகைத்து வெளி அன்பு பாராட்டுதல்]
பரிமேலழகர் குறிப்புரை: உறழ்ச்சி, நிரல்நிறை வகையான் கொள்க. அழித்தல் - ஒளியைக் கோறல். [ஒளியைக் கோறல்-மிக்குத்தோன்றும் மதிப்பைக் கெடுத்தல்]

'ஒருவனைக் காணாத விடத்து இழித்துரைத்துக் கண்டவிடத்துப் பொய் செய்து நகுதல்' என்றபடி பழைய ஆசிரியர்கள் இப்பகுதிக்கு உரை கூறினர். காலிங்கர் புறன்+ நழீஇ எனப் பிரித்துப் புறத்துப் போந்து எனப் பொருள் கொள்வார்.

இன்றைய ஆசிரியர்கள் 'ஒருவனைக் காணாத இடத்து இகழ்ந்துரைத்து முகத்தெதிரே பொய்யாகச் சிரித்துப் பேசுதல் தீமையுடையது', 'ஒருவனைக் காணாத விடத்தில் நழுவி அவனைப்பற்றி பொய்யான கோள்களைச் சொல்லி மகிழ்ச்சியடைவது', 'ஒருவன் பெருமையை அவனுக்குப் புறத்தே அழித்துப் பேசி அவனைக் கண்டபோது பொய்யாக அவனைப் புகழ்ந்துரைத்து நகையாடுதல்', 'காணாதவிடத்து இகழ்ந்து உரைக் கண்ட வழிப் பொய்யாக நகுதல்' என்றபடி இப்பகுதிக்குப் பொருள் உரைத்தனர்.

காணாதவிடத்து இகழ்ந்துரைத்துக் கண்ட வழிப் பொய்யாக நகுதல் என்பது இப்பகுதியின் பொருள்.

நிறையுரை:
அறனழீஇ தீயன செய்தலைவிடக் கொடியதே காணாதவிடத்து இகழ்ந்துரைத்துக் கண்ட வழிப் பொய்யாக நகுதல் என்பது பாடலின் பொருள்.
'அறனழீஇ' என்ற தொடர் குறிப்பது என்ன?

அவன் இங்கில்லாத போது அவனைப் பற்றித் தப்பாகப் பேசினான், அவன் வந்தவுடன் அவனுடன் இளித்துப் பழகுகிறான். என்ன கொடுமை இது!

ஒருவனைக் காணாத இடத்தில் இகழ்ந்துரைத்து, அவனைப் பார்த்தபோது பொய்யாகச் சிரித்துப் பழகுதல், அறநெறிகளைப் புறந்தள்ளித் தீயனவற்றைச் செய்தலைவிடத் தீதாகும்.
'இதனினும் இது இனிது' என்று முந்தைய குறள் (181) சொல்ல, இப்பாடல் 'இதனினும் இது தீது' என்ற நடையில் அமைகிறது.
அறனழீஇ என்ற தொடர் அறத்தை அழித்து அல்லது ஒழித்து எனப் பொருள்படும். புறனழீஇ என்ற தொடர் புறத்தே இகழ்ந்து அழித்தல் அதாவது பெயரைக் கெடுக்கும் வண்ணம் பேசுதல் என்ற பொருள் தரும்.
அறத்தை ஒழித்து நல்லன அல்லாதவற்றைச் செய்வதைக் காட்டிலும் தீதானதே புறத்தே ஒருவனது உயர்வைப் பழித்துப் பேசி முகத்தெதிரே பொய்யாக இன்முகம் காட்டிச் சிரித்துப் பேசுதல் என்கிறது பாடல். அறம் நீங்கிய செயல்களைவிடத் தீங்கானது புறம் சொல்லுதல் என்பது மீண்டும் இங்கே வற்புறுத்தப்பெறுகிறது. அதாவது அறம் நீங்கி ஒழுகுவதால் உண்டாகக் கூடிய தீங்கைக் காட்டிலும் புறம் சொல்லுவதால் கிட்டும் தீங்கானது பெரிது என்பது திரும்பச் சொல்லப்படுகிறது. புறங்கூறுதலே ஒரு தீய செயல். அதிலும் அப்படிப் புறங்கூறியவரே தாம் யாரைப்பற்றிப் புறம்பேசினாரோ அவரைக் காணும்போது, பொய்யாக சிரித்துப் பேசுதல் இன்னும் பெரிய தீமையாகிறது. புறத்தில் பழித்து கூறி நேரில் கண்டபோது பொய்யாகப் பழகும் இத்தகைய போலித்தனமான செயல் வஞ்சகமுமாகும். புறங்கூறிய செய்தி உண்மையாகவும் இருக்கலாம் பொய்யுமாகலாம்‌. எதிரே உயர்வாகப் பேசிப்‌ புறத்தே இகழ்ந்துரைத்தபோது அவை‌ ஒன்றை யொன்று மறுத்துப்‌ பொய்ப்படுவதால் தீதாம்.

ஒருவன் இல்லாதபோது அவனைப் பற்றி இகழ்ந்து பேசி, நேரில் பொய்யாகச் சிரித்துப் பழகுவது அறமல்லாதவற்றைச் செய்வதைக் காட்டிலும் தீது என்கிறது பாடல். இக்குறளுக்கு காலிங்கரின் உரை சற்று வேறுபடுகிறது. 'பொய்த்து நகை' என்றதற்குப் பொய்யானவற்றை பிறரோடு சொல்லி எள்ளி நகையாடுவது என்ற பொருளில் உரைக்கிறார் இவர். இவ்வுரை ஒருவரைப் பற்றிப் புறத்தே தாழ்த்திப் பேசுவது மட்டுமல்லாமல், அவரைப் பற்றிப் பொய்யானவற்றை இட்டுக்கட்டிப் பிறரோடு எள்ளி நகையாடுவது எனச் சொல்கிறது. எனவே கொடுமையானது. மேலும் புறங்கூறுதலும், பொய்த்து நகுதலும் புறங்கூறப்பட்டவன் இல்லாத இடத்திலே நடைபெறுவதாக இவருரை உள்ளது.

அறத்தை ஒழித்தல் அதாவது கைவிடுதல், பின் அறமல்லாதவற்றைச் செய்தல், ஆகிய இவையிரண்டினும், புறத்தே இகழ்ந்துரைத்து ஒருவன் உயர்வை அழித்தல், பின்னர் நேரில் அவனுடன் பொய்யாக நகையாடுதல் இவை இரண்டும் தீது.

'அறனழீஇ' என்ற தொடர் குறிப்பது என்ன?

'அறனழீஇ' என்ற தொடர்க்கு அறத்தை யழித்து, தன்மத்தை அழித்து, அறத்தினின்றும் நீங்கி, அறன் என்பது ஒன்று இல்லை என அழித்துச் சொல்லி, அறத்தையே இல்லையென அழித்துக்கூறி, அறத்தினை அழித்து, அறம் அழித்து, அறமாயினவற்றை அழித்து இல்லை என்று சொல்லி, அறத்தினின்றும் நழுவி, அறமுறையை அழித்து, அறத்தைச் சிதைத்து, அறநெறிகளைக் கெடுத்து, அறம் கடந்த செயல்கள் புரிவது, அறத்தைக் கெடுத்து, அறம் என்றே ஒன்றுமில்லையென அழித்துக்கூறி, அறத்தைக் கொன்று, நல்லது கெட்டது தெரியாமல் தவறு செய்வது, அறங்களை அழித்துப் பேசி என்றவாறு உரையாசிரியர்கள் பொருள் கூறினர்.

உரையாளார்கள் பலரும் அறத்தை அழித்து/ஒழித்து/கெடுத்து/சிதைத்து எனப் பொருள் கண்டனர். காலிங்கர் அறன்+நழீஇ எனப் பிரித்து அறத்தினின்று நழுவி அதாவது அறத்தினின்றும் நீங்கி எனப் பொருள் கொண்டார். நாமக்கல் இராமலிங்கமும் இவ்வாறே பிரித்தார்.
௮றனழீஇ என்பது அறனொழித்து என்னும்‌ பொருள்பட நின்றது. ஒருவன் அறம் பற்றி எதுவும் தெரியாதவனாக இருக்கிறான் அல்லது அறம் என்று ஒன்றுமேயில்லையென அதைத் தன் நினைவிலிருந்து அழித்து விடுகிறான். இவனுக்கு மனச்சான்று கிடையாது. இத்தகையவன் பொய், ஏமாற்றுதல், வஞ்சகம் செய்தல் போன்ற எல்லாவகைத் தீமைகளையும் உள்ளம் உறுத்தலின்றிச் செய்வான். புறம் கூறுபவன் அறத்தைக் கைவிட்ட இவனைவிடத் தீயவன் என வள்ளுவர் இங்கு குறிப்பிடுகிறார்.

அறனழீஇ என்றதற்கு அறநெறிகளை அழித்து அதாவது ஒழித்து என்பது பொருள்.

அறநெறிகளிலிருந்து நீங்கித் தீயன செய்தலைவிடக் கொடியதே காணாதவிடத்து இகழ்ந்துரைத்துக் கண்ட வழிப் பொய்யாக நகுதல் என்பது இக்குறட்கருத்து.

பொய்யாக நகைத்து உறவாடி புறங்கூறாமை வேண்டும்.

அறத்தைச் சிதைத்துச் செய்யும் தீதைவிட ஒருவனைக் காணாத இடத்து இகழ்ந்து முகத்தெதிரே பொய்யாகச் சிரித்துப் பழகுவது.