பொருள்கோள் வரிஅமைப்பு:
ஒருவன் அறம்கூறான், அல்ல செயினும், புறம்கூறான் என்றல் இனிது.

பதவுரை: அறம்-நல்வினை; கூறான்-சொல்லுவதும் செய்யாதவனாய்; அல்ல-தீயனவற்றை, நல்லனவல்லாதவற்றை, ஆகாதவைகளை; செயினும்-செய்தாலும்; ஒருவன்-ஒருவன்; புறம்-புறத்தே, காணாதவிடம்; கூறான்-(இகழ்ந்து)கூறமாட்டான்; என்றல்-என்று சொல்லப்படுதல்; இனிது-நல்லது, நன்றானாது.

அறம்கூறான் அல்ல செயினும் ஒருவன்:

இப்பகுதிக்குத் தொல்லாசிரியர்கள் உரைகள்:
மணக்குடவர்: ஒருவன் அறத்தை வாயாற் சொல்லுதலுஞ் செய்யானாய்ப் பாவஞ் செய்யினும்;
பரிதி: புண்ணியத்தின் வழியைப் பேசான்; பாவமே செய்வானாகிலும்;
காலிங்கர்: தன் நாவினால் ஒருவன் அறத்தினைச் சொல்லானுமாய், பாவமாகிய அல்லாதனவற்றைச் செய்வானாகிலும்;
பரிமேலழகர்: ஒருவன் அறன் என்று சொல்லுவதும் செய்யாது பாவங்களைச் செய்யுமாயினும்;

'ஒருவன் அறன் என்று சொல்லுவதும் செய்யாது பாவமே செய்வானாகிலும்' என்றபடி பழம் ஆசிரியர்கள் இப்பகுதிக்கு உரை நல்கினர்.

இன்றைய ஆசிரியர்கள் 'ஒருவன் அறத்தைப் பழித்துத் தீமை செய்யினும்', 'ஒருவன் அறம் என்பதையே அறியாதவனாக அறம் அல்லாத காரியங்களைச் செய்கிறவனாக இருந்தாலும்', 'ஒருவன் தருமம் என்னுஞ் சொல்லைக் கூடச் சொல்லாது தீயன செய்து ஒழுகினும்', 'ஒருவன் அறநெறிகளைக் கூறாமல் தீயனவற்றைச் செய்தாலும்', என்ற பொருளில் இப்பகுதிக்கு உரை தந்தனர்.

ஒருவன் அறம் பற்றி அறியாதவனாக, தீயனவற்றைச் செய்தாலும் என்பது இப்பகுதியின் பொருள்.

புறம்கூறான் என்றல் இனிது:

இப்பகுதிக்குத் தொல்லாசிரியர்கள் உரைகள்:
மணக்குடவர்: பிறரைப் புறஞ் சொல்லானென்று உலகத்தாரால் கூறப்படுதல் நன்றாம்.
மணக்குடவர் குறிப்புரை: இது பாவஞ்செய்யினும் நன்மை பயக்கும் என்றது.
பரிதி: ஒருவன் குற்றத்தைப் புறம் சொல்லாதிருப்பவன் ஈடேறுவான். [ஈடேறுவான் - உயர்வான்].
காலிங்கர்: புறங்கூறான் என்று பிறர் சொல்லுமாறு இருத்தல் பெரிதும் இனிது என்றவாறு.
பரிமேலழகர்: பிறனைப் புறம் கூறான் என்று உலகத்தாரால் சொல்லப்படுதல் நன்று.
பரிமேலழகர் குறிப்புரை: புறம் கூறாமை அக்குற்றங்களான் இழிக்கப்படாது, மேற்பட்டுத் தோன்றும் என்பதாம். இதனால் அவ்வறத்தினது நன்மை கூறப்பட்டது.

'பிறரைப் புறஞ் சொல்லானென்று உலகத்தாரால் கூறப்படுதல் நன்றாம்' என்றபடி பழைய ஆசிரியர்கள் இப்பகுதிக்கு உரை கூறினர்.

இன்றைய ஆசிரியர்கள் 'கோள் சொல்லான் என்பது காதுக்கு இனிது', 'அவன் கோள் சொல்ல மாட்டான் என்பது சிறப்புடையது', 'அவன் புறங்கூற மாட்டான் என்ற பெயர் பெறுதல் நல்லதே. (அது பிறர்க்கு மகிழ்ச்சி விளைப்பது என்பது கருத்து)', 'காணாதவிடத்துப் பழித்து உரையான் என்று சொல்லப்படுதல் இன்பம் பயக்கும்' என்றபடி இப்பகுதிக்குப் பொருள் உரைத்தனர்.

புறங்கூற மாட்டான் என்ற பெயர் பெறுதல் நல்லது என்பது இப்பகுதியின் பொருள்.

நிறையுரை:
அறம்கூறான், தீயனவற்றைச் செய்தாலும், புறங்கூற மாட்டான் என்ற பெயர் பெறுதல் நல்லது என்பது பாடலின் பொருள்.
'அறம்கூறான்' யார்?

அறம் அறியாதவனாக இருந்தாலும் புறம் கூறுவதை மட்டுமாவது செய்யாதே!

அறநெறியைப் பொருட்படுத்தாதவனாய் தீயவற்றைச் செய்பவனாய் ஒருவன் இருந்தாலும் கூட, புறங்கூற மாட்டான் என்று பெயர் பெற்றவனானால் நல்லது.
ஒருவன் அறம் பற்றித் தெரியாதவனாக நல்லன அல்லாதவற்றையே செய்து வருகிறான். ஆனால் அவன் புறங்கூறாத நல்லியல்புடையான் அதாவது ஒருவர்பாற்‌ அவர் இழிவந்தன செய்தாரெனப் பழிவருமாறு செய்யமாட்டான் என்று பெயரெடுத்தவனாதலால் இவனது தீய செயல்கள் மறக்கப்படும் என்பது இக்குறள் தரும் செய்தி. அதாவது நன்மையற்றவற்றைச் செய்தாலும் தாழ்வில்லை; புறம் பேசமாட்டான் என்ற பெயரையாவது காத்துக் கொள்ளல் நல்லது என்பது கருத்து. புறம் கூறுதல் என்பது மிகத் தீமையானது எனச் சொல்லவருகிறது இப்பாடல். வேறு தீச்செயல்களில் ஈடுபட்டிருந்தாலும் அவை புறங்கூறாமை என்ற நற்குணத்தின் முன் நில்லாது என்பதாம்.
புறங்கூறல் என்பது ஒருவர் காணாதவிடத்து அவரைப்பற்றி இகழ்ச்சியான மொழியால் சொல்லப்படுவது; பொறாமையால் பேசப்படுவ்து; தீமை விளைவிப்பது; ஒருவர் மீது கொண்ட நம்பிக்கையை அழித்துக் கூறப்படுவது. இக்காரணங்களால் புறங்கூறுதல் மிகக் கொடியது என்று சொல்லி அக்குற்றத்தை அகற்றிக்கொள் எனக் கனிவாக அறிவுரை தருகிறார் வள்ளுவர்.

ஒருவன் தீவினைகள் பல செய்தாலும் அவையெல்லாம் அவனது புறங்கூறாமை என்ற ஒர் நற்குணத்தின் முன் மறைந்துவிடும் என்கிறது பாடல். அதனால் தீவினைகள் செய்யலாம் என்று வள்ளுவர் கூறுகிறார் என்பதல்ல பொருள். வேறு பல தீச்செயல்கள் செய்திருந்தாலும், புறங்கூறாமையானது நன்மை பயக்கும் எனக் கொள்ள வேண்டும். புறங்கூறான் என்ற ஒரு நல்ல குணம் மற்ற தீய செயல்களை நினைக்கச் செய்யாமலிருக்க வைத்து விடும் என்று சொல்லப்படுகிறது. ஒன்றை வலியுறுத்தி ஒருவருடைய உள்ளத்தில் உள்ள ஒரு மாசை அகற்றினால், மற்றவையும் நாளடைவில் விலகிப் போகும் என்பதற்காக வள்ளுவர் கையாளும் உத்தி இது. இதனினும் இது பெரியது, இதனினும் இது தீது, இதனினும் இது நன்று, இதனினும் இது இன்னாதது எனப் பல்வேறு நிலையில் குறட்பாக்கள் உரைக்கும். அதில் இதனினும் இது இனிது என்ற மொழிநடையில் அமைந்த பாடல் இது.

'தகாதன செய்தவனைத் திருத்துதலாகிய அறங்கூறுதலையும், அவனுக்கும் பழிவந்தன செய்தலையும் உடையனாயினும் புறங்கூறான் என்றலினிது' என அறமாயின கூறுதல், அல்லவை செய்தல் என்பவற்றுக்கு ஓர் விளக்கம் உள்ளது.
'ஒருவன் எவராலும் ஒரு தருமமும் தனக்குச் சொல்ல வேண்டாதவனாய்த் தானே எல்லா தருமங்களையும் அறிந்து நல்வினைகளையே செய்து வந்தானாயினும், அவனுக்குப்பிறனைப் புறங்கூறானென்பது அவ்வெல்லாத் தருமங்களிலும் நன்மை தருவதாம் என்று உரை கூறவும் இடமுண்டு' என்றபடி வை மு கோபாலகிருஷ்ணமாச் சாரியார் உரைத்தார். 'இவ்வுரை, கூறாமையை ஒருவன் மேலும், செய்தலை அறனல்லாத பிறன் மேலும் கொண்டு பொருள் கூறுவது. மேலும் 'கூறான் நல்ல செயினும்' எனப் பிரித்து கூறான் என்பதற்கு எவராலும் சொல்ல வேண்டாதவனாய் என்று பொருளுரைப்பர். அல்ல செயினும் புறங்கூறான் என்றல் இனிது என்பதில் கருத்தழுத்தம் (புறங்கூற்றின் கொடுமை) உள்ளதே யன்றி நல்ல செயினும் எனப் பிரித்துப் பொருள் கொள்வதில் அஃதின்மை ஊன்றி நோக்குவார்க்குப் புலனாம்' என்பார் இரா சாரங்கபாணி.

'அறம்கூறான்' யார்?

'அறம்கூறான்' என்ற சொல்லுக்கு அறத்தை வாயாற் சொல்லுதலுஞ் செய்யான், புண்ணியத்தின் வழியைப் பேசான், தன் நாவினால் அறத்தினைச் சொல்லான், அறன் என்று சொல்லுவதும் செய்யான், அறமானவற்றைப் பேசான், அறத்தினை எடுத்துக் கூறான், அறத்தைப் பழிப்பான், அறத்தின் வழியைப் பேசாதவன், அறம் என்பதையே அறியாதவன், அறநெறியில் ஒன்றைச் சொல்லாதவன், தருமம் என்னுஞ் சொல்லைக் கூடச் சொல்லாதவன், அறநெறிகளைக் கூறாதவன், அறம் சார்ந்து பேசாதவன், அறம் என்று கூறுவதும் இயலான், அறம் என்னுஞ் சொல்லையுஞ் சொல்லாதவன், அறமொழி கூறமாட்டாதவன், அறங்களைக் கூறாதவன், அறத்தைப் போற்றிக் கூறாதவனாய் என்று உரையாளர்கள் பொருள் கூறினர்.

'அறம்கூறான்' என்ற தொடர்க்குப் பரிதி 'புண்ணியத்தின் வழியைப் பேசான்' எனப் பொருள் தந்தார்.
நாகை சொ தண்டபாணி பிள்ளை 'அறமாயின கூறுதலாவது, இகழ்ச்சிக்குரிய செய்தவனையணுகி அவன் முகத்தெதிரே அவன் செயலின் தன்மையும் பயனும் இனைய வென எடுத்துக்காட்டி அவன் நல்வழிப் படுதற்காவன கூறல்' என விளக்கம் தந்தார். இதற்கு எடுத்துக்காட்டாக 'கண்ணின்று' (184) 'அறஞ்சொல்லும் நெஞ்சத்தான்' (185) என்ற குறட்பாக்களையும் சுட்டினார்.
நாமக்கல் இராமலிங்கம் 'அறம் கூறான் அல்ல செய்யினும்' என்பதற்கு 'ஒருவன் அறம் என்ற கூறுபாட்டின்படி அறம் அல்லாதவற்றைச் செய்கிறவனானாலும்' என்று உரை கூறி, 'கூறான் - சொல்லமாட்டான் என்ற பொருள் தருவதல்ல. கூறு ஆன என்பது கூறுபாடு என்னும் பொருள் தரும்' என்பார். ஆனால் 'இவ்வுரை ஏற்புடையதன்று எனத் தோன்றுகிறது. இங்ஙனம் உரை செய்தனாற் போந்த புறப்பொருளும் இல்லை என்பதும் சிந்திக்க' என்கிறார் தண்டபாணி தேசிகர்.
அறம் கூறல் என்பது நல்வினை அல்லது நன்மை தரும் சொல் கூறல் என்ற பொருள் தரும். அறம்கூறான் என்றது நன்மை தரும் சொல்லைச் சொல்லாதவன் எனப் பொருள்படும்.

'அறங்கூறான்' என்பது அறம் பற்றி அறியாதவன் குறித்தது.

ஒருவன் அறம் பற்றி அறியாதவனாக, தீயனவற்றைச் செய்தாலும், புறங்கூற மாட்டான் என்ற பெயர் பெறுதல் நல்லது என்பது இக்குறட்கருத்து.

புறங்கூறாமை மற்ற மறச் செயல்களை மறக்கடிக்கும்.

ஒருவன் அறம் அறியாது அறம் அல்லாதவை செய்வானாகிலும் புறங்கூறான் என்று சொல்லப்படுதல் நல்லது.