• 561ஆம் குறள் குற்றத்தை முறைப்படி ஆராய்ந்து, ஒறுக்கப்பட்டவன் மேலும் குற்றத்தைச் செய்யாமல் இருக்குமாறு, உலகோர் ஒப்பத் தண்டிப்பது அரசு என்கிறது.
• 562ஆம் குறள் நெடுங்கால மேம்பாடு நீங்காமல் இருக்க விரும்புபவர், கடிது செய்வார்போல் காட்டிப் பின் மெல்லெனச் செய்க எனக் கூறுவது.
• 563ஆம் குறள் ஆட்சியாளன் குடிகள் நடுங்கும்படியாக ஆட்சிபுரியும் வெங்கோலனாய் ஆகிவிட்டால், ஒருவந்தம் விரைந்து அழிவான் என்பதைச் சொல்வது.
• 564ஆம் குறள் 'ஆட்சித் தலைவன் கொடியவன்' என்று குடிகள் வசைகூறத் தொடங்கினால் அவன் உறையும் இடம் இழந்து விரைந்து அழிவான் என்கிறது.
• 565ஆம் குறள் எளிதில் காண முடியாதவனாகவும் காணும் போது கடுமைகாட்டும் முகம்கொண்டவனாகவும் உள்ள ஆட்சித்தலைவனின் பெருஞ் செல்வம் பேயிடம் அகப்பட்டது போன்றது எனக் கூறுவது.
• 566ஆம் குறள் குடிகளிடம் கடுஞ்சொல் கூறுபவனாகவும் இரக்கம் இல்லாதவனாகவும் ஆட்சியாளர் இருப்பின் தொன்றுதொட்டு வரும் செல்வம் நீடித்திராமல் அப்பொழுதே அழியும் என்கிறது.
• 567ஆம் குறள் கடுஞ்சொல்லும் முறையற்ற தண்டனை அளித்தலும் பகையை வெல்லும் ஆட்சியாளரது வலிமையை அறுக்கும் அரமாகும் எனச் சொல்கிறது.
• 568ஆம் குறள் அரசியல் சுற்றத்தோடு கலந்து செய்யாத ஆட்சித்தலைவன் வறிதே சினம் கொண்டுசீறிச் செயல்படுவானாயின் ஆட்சிச்செல்வம் சுருங்கும் என்கிறது.
• 569ஆம் குறள் போர்க்காலத்து காவாத ஆட்சித்தலைவன் அச்சமுற்று வெம்மையால் அழிவான் எனக் கூறுகிறது.
• 570ஆவது குறள் கடுங்கோல் ஆட்சி அறிவில்லாதாரை ஈர்க்கும்; பூமிக்குச் சுமையாவது அதுவன்றி வேறொன்று இல்லை என்கிறது.

பிற பண்பாடுகளில் பிறப்பு வகையால் ஆட்சித்தலைவனைத் தெய்வமாக்கித் தொழுதலும் அங்ஙனம் சொல்லுதலும் வழக்கு. ஆனால் வள்ளுவர் வெருவந்த செய்தொழுகும் ஆட்சியரை 'இறைகடியன்' (564), 'அருஞ் செவ்வி இன்னா முகத்தான்' (565), 'வெருவந்த செய்தொழுகும் வெங்கோலன்' (563) என இழித்துரைக்கிறார்.

தண்டனை வழ்ங்கும் முறையையும் அத்தண்டனயை எவ்வாறு நிறைவேற்ற வேண்டும் என்பதையும் தக்காங்கு நாடித் தலைச்செல்லா வண்ணத்தால் ஒத்தாங்கு ஒறுப்பது வேந்து(குறள் 561) கடிதோச்சி மெல்ல எறிக நெடிதுஆக்கம் நீங்காமை வேண்டு பவர் (குறள் 562) என்ற பாடல்கள் சொல்கின்றன. மற்ற குடியினர் அஞ்சும்படி அளவிறந்து தண்டிக்கக்கூடாது. ஒறுத்தல் என்பது குற்றம் செய்தவரை அழித்தற்கல்ல; அது திருத்தப்பாட்டினையே நோக்கமாகக் கொண்டதாக இருக்கவேண்டும் என்பதை அழகுறச் சொல்கிறது இப்பாடல்கள். தண்டனையென்னும் கோலைக் கடுமையாக ஓச்சுவதுபோலக் காட்டி லேசாகத் தண்டித்து, குற்றவாளியைத் திருத்த முயலவேண்டும் என்பது கருத்து. 'தக்காங்கு..' என்னும் குறள் 561 'நீடு நினைந்து மிக்க விழிப்போடு யாத்த பா' என்று கூறி அதன் 'சொற்றோறும் அன்பு ஓடுதல் காண்க' என்கிறார் வ சுப மாணிக்கம்.

நாட்டின் நிதி ஆதாரங்கள் கொடுங்கோல் ஆட்சியிடம் சிக்கும்போது அது பேய் காக்கும் செல்வம் போல் யாருக்கும் பயனின்றிப் போகும் என்று அருஞ்செவ்வி இன்னா முகத்தான் பெருஞ்செல்வம் பேஎய்கண் டன்னது உடைத்து (குறள் 565) என்ற பாடல் வழி சொல்லப்பட்டது. பேய்க்கும், பெருஞ்சினம் கொண்ட ஆட்சியாளனுக்கும் பொருந்த ஒப்புமை கூறப்பட்டது.

வெருவந்த செய்யும் ஆட்சித்தலைவனால் அறிவற்றவர்களே ஈர்க்கப்படுவர். வெங்கோலனுடன் சேர்ந்த இந்தப் பண்பில்லா கயவ்ர் கூட்டணி நாட்டுக்குக் கடுங்கோல்ஆட்சியையே தரும். அக்கொடுங்கோலாட்சி நாட்டுக்குச் சுமையாகவே அமையும் என்ற பொருளில் கல்லார்ப் பிணிக்கும் கடுங்கோல் அதுவல்லது இல்லை நிலக்குப் பொறை என்று கூறும் குறள் 570 இவ்வதிகாரத்தின்கண் உள்ளது.