இத்தளத்துள் தேட...

செல்க: முகப்பு |

குறள் எண் 1203



நினைப்பவர் போன்று நினையார்கொல் தும்மல்
சினைப்பது போன்று கெடும்

(அதிகாரம்:நினைந்தவர்புலம்பல் குறள் எண்:1203)

பொழிப்பு: தும்மல் வருவதுபோலிருந்து வாராமல் அடங்குகின்றதே! என் காதலர் என்னை நினைப்பவர்போலிருந்து நினையாமல் விடுகின்றாரோ?

மணக்குடவர் உரை: அவர் நம்மை நினைப்பவர்போன்று நினையார் கொல்லோ: தும்மல் தோன்றுவதுபோன்று கெடாநின்றது.
தலைமகள் உலகத்துப் பெண்டிராயுள்ளார் கூறுவதொன்றை ஈண்டுக் கூறினாள்.

பரிமேலழகர் உரை: (தலைமகனை நினைந்து வருந்துகின்ற தலைமகள் தோழிக்குச் சொல்லியது.) தும்மல் சினைப்பது போன்று கெடும் - எனக்குத் தும்மல் எழுவது போன்று தோன்றிக் கெடாநின்றது; நினைப்பவர் போன்று நினையார்கொல் - அதனால் காதலர் என்னை நினைப்பார் போன்று நினையாராகல் வேண்டும்.
(சினைத்தல்: அரும்புதல். சேய்மைக்கண்ணராய கேளிர் நினைந்துழி அந்நினைக்கப்பட்டார்க்குத் தும்மல் தோன்றும் என்னும் உலகியல்பற்றித் தலைமகன் எடுத்துக்கொண்ட வினை முடிவதுபோன்று முடியாமை யுணர்ந்தாள் சொல்லியதாயிற்று.

இரா சாரங்கபாணி உரை: எனக்குத் தும்மல் வருவதுபோல் தோன்றி வரவில்லை. ஆதலால், தலைவர் என்னை நினைப்பார் போலக் காட்டி நினைக்க மாட்டாரோ?


பொருள்கோள் வரிஅமைப்பு:
தும்மல் சினைப்பது போன்று கெடும்; நினைப்பவர் போன்று நினையார்கொல்!


நினைப்பவர் போன்று நினையார்கொல்:
பதவுரை: நினைப்பவர்-எண்ணுபவர்; போன்று-ஒத்து; நினையார்-எண்ணமாட்டார்; கொல்-(ஐயம்).

இப்பகுதிக்குத் தொல்லாசிரியர்கள் உரைகள்:
மணக்குடவர்: அவர் நம்மை நினைப்பவர்போன்று நினையார் கொல்லோ;
பரிப்பெருமாள்: அவர் நம்மை நினைப்பவர்போன்று நினையார் கொல்லோ:
பரிதி: நினைத்து நினையாரோ என் காதலர்;
காலிங்கர்: தோழீ! அவர் நம்மை இப்பொழுது சிறிது நினைப்பவர் போன்று எடுத்துப் பின்னும் நினையார் ஆயினர் போலும்;
பரிமேலழகர்: (தலைமகனை நினைந்து வருந்துகின்ற தலைமகள் தோழிக்குச் சொல்லியது.) அதனால் காதலர் என்னை நினைப்பார் போன்று நினையாராகல் வேண்டும்.

'அவர் நம்மை நினைப்பவர்போன்று நினையார் கொல்லோ' என்றபடி பழம் ஆசிரியர்கள் இப்பகுதிக்கு உரை நல்கினர்.

இன்றைய ஆசிரியர்கள் 'அவர் என்னை நினைப்பதுபோல விட்டுவிடுவாரோ?', 'என் காதலர் என்னை நினைப்பது போல் இருந்து நினைக்கவில்லை எனத் தெரிகிறது', '(தலைவி கூற்று) ஆதலால் காதலர் என்னை நினைப்பதாகத் தொடங்கி நினைக்க மாட்டாரோ?', 'அதனால் காதலர் என்னை நினைப்பார் போன்று நினையாது இருத்தல் வேண்டும்', என்ற பொருளில் இப்பகுதிக்கு உரை தந்தனர்.

அவர் என்னை நினைப்பார் போன்று நினைக்க மாட்டாரோ? என்பது இப்பகுதியின் பொருள்.

தும்மல் சினைப்பது போன்று கெடும்:
பதவுரை: தும்மல்-தும்முதல்; சினைப்பது-அரும்புவது; போன்று-போல; கெடும்-கெடாநின்றது.

இப்பகுதிக்குத் தொல்லாசிரியர்கள் உரைகள்:
மணக்குடவர்: தும்மல் தோன்றுவதுபோன்று கெடாநின்றது.
மணக்குடவர் குறிப்புரை: தலைமகள் உலகத்துப் பெண்டிராயுள்ளார் கூறுவதொன்றை ஈண்டுக் கூறினாள்.
பரிப்பெருமாள்: தும்மல் தோன்றுவதுபோன்று கெடாநின்றது.
பரிப்பெருமாள் குறிப்புரை: தலைமகள் உலகத்துப் பெண்டிராயுள்ளார் கூறுவதொன்றை ஈண்டுக் கூறினாள். இவ்வாறு செய்தலான் நினைப்பாரைப் போன்று நினையாராக வேண்டும் என்று தோழிக்குக் கூறியது.
பரிதி: அது தும்மல் வருவதுபோல் அடங்கும் என்றவாறு.
காலிங்கர்: என்னை காரணம் எனின், தும்மலானது என் முகத்திற்கு ஆகாதது வருமதுபோலத் தோன்றிப் பின் உள்ளடங்கிவிடும் என்றவாறு.
பரிமேலழகர்: எனக்குத் தும்மல் எழுவது போன்று தோன்றிக் கெடாநின்றது.
பரிமேலழகர் குறிப்புரை: சினைத்தல்: அரும்புதல். சேய்மைக்கண்ணராய கேளிர் நினைந்துழி அந்நினைக்கப்பட்டார்க்குத் தும்மல் தோன்றும் என்னும் உலகியல்பற்றித் தலைமகன் எடுத்துக்கொண்ட வினை முடிவதுபோன்று முடியாமை யுணர்ந்தாள் சொல்லியதாயிற்று.

'தும்மல் வருவதுபோல் தோன்றி அடங்கும்' என்றபடி பழைய ஆசிரியர்கள் இப்பகுதிக்கு உரை கூறினர்.

இன்றைய ஆசிரியர்கள் 'தும்மல் வருவதுபோல நின்றுவிடுதலின்', 'அதனால்தான் எனக்கு வருவதுபோல் இருந்த தும்மல் வரவில்லை', 'எனக்குத் தும்மல் உண்டாவதுபோலத் தோன்றி இல்லையாகின்றது', 'எனக்குத் தும்மல் வருவது போன்று வராமல் இருந்து விட்டது' என்றபடி இப்பகுதிக்கு பொருள் உரைத்தனர்.

தும்மல் உண்டாவதுபோலத் தோன்றிப் பின் உள்ளடங்கிவிடும் என்பது இப்பகுதியின் பொருள்.

நிறையுரை:
தும்மல் பாதியிலேயே நின்றுவிட்டது; அவர் என்னை நினைக்கத் தொடங்கி பின் விட்டுவிட்டாரோ?

என்னை நினைப்பார் போன்று நினைக்க மாட்டாரோ? அதனால்தான் தும்மல் சினைப்பது போன்று பின் உள்ளடங்கிவிடுகிறது என்பது பாடலின் பொருள்.
'சினைப்பது போன்று' என்பதன் பொருள் என்ன?

நினைப்பவர் போன்று என்ற தொடர்க்கு நினைப்பார் போல என்பது பொருள்.
நினையார்கொல் என்றது நினைக்க மாட்டார் போலும் என்ற பொருள் தரும்.
தும்மல் என்ற சொல்லுக்குத் தும்முதல் என்று பொருள்.
கெடும் என்ற சொல் மறையும் எனப் பொருள்படும்.

தும்மல் அரும்புவதுபோலத் தோன்றி மறைகின்றது எனக்கு. ஆதலால் காதல்கொண்டவர் என்னை நினைக்கத் தொடங்கி நினைக்காது விடுகின்றாரோ?

தலைவன் பணி காரணமாகப் பிரிந்தபின் காதலி ஆற்றமாற்றாளாகிறாள். எப்பொழுதும் அவனைப்பற்றியே எண்ணி ஏங்கிக் கொண்டிருக்கிறாள். அவன் நினைவில் ஆறுதல் பெற முயல்கிறாள். அது சமயம் அவளுக்குத் தும்மல் எழுவதுபோல் தோன்றுகிறது. ஆனால் அது வெளிப்படாமல் அரை குறையாக நின்றுவிடுகிறது. அப்பொழுது அவள் கூறுகிறாள்: 'என்ன இது தும்மல் வருவது போல இருந்து, வராமல் போய் விட்டதே. அவர் நம்மை நினைக்கத் தொடங்கி பின் விட்டுவிட்டார் போல; அதனால்தான் என தும்மலும் உள்ளடங்கிவிட்டது.'

தும்மல் வந்தால் 'தன்னை யாரோ ஒருவர் நினைக்கிறார்' என மாந்தர் நம்புவதை இன்றும் நாம் காண்கிறோம். உரிமையுடைய ஒருவரை ஆழமாக நினைத்தால் நினைக்கப்பட்டார்க்குத் தும்மலும் புரையேறுதலும் உண்டாகும் என்பது ஓர் நம்பிக்கை. நீர்க்கோவையால் வரும் தும்மல் இதில் அடங்காது. உண்ணும்போதும், ஒன்றும் செய்யாமல் வாளா இருக்கும்போதும் எழும் தும்மலைப்பற்றியே இவ்வாறு கருதுவர். நற்குறி, தீக்குறி என்பதைப் பொறுத்து அவை நமக்கு எதிர்வரும் இன்பங்களையும், துன்பங்களையும் அறிவிக்கும் என்பதும் நம்பிக்கை. இ்வற்றிற்கு அறிவியல் ஆதாரம் ஒன்றும் இல்லை.
தும்மல் ஓர் நற்குறி தெரிவிக்கும் நிகழ்வு என்பதுபற்றி ஐந்திணை எழுபதில் ஓர் பாடல் உள்ளது. அது:
மன்ற முது மரத்து ஆந்தை குரல் இயம்ப,
குன்றகம் நண்ணி, குறும்பு இறந்து சென்றவர்
கள்ளிய தன்மையர் போலும்-அடுத்து அடுத்து
ஒள்ளிய தும்மல் வரும்.

(ஐந்திணை எழுபது (40) கருத்து: பொருள்வயிற் பிரிந்த நம்தலைவர், மன்றின் கண்ணுள்ள, ஆலமரத்தில் வாழும் ஆந்தையானது ஒலிக்க, அடுத்து அடுத்து நலமிகுந்த தும்மலானது நம்மிடத்துத் தோன்றியதால், களவின் கண் நம்மாட்டு அவர் கொண்ட கடுங்காதல் போன்று இஞ்ஞான்றுங் கொண்டு மீள்வர்போற் காண்கின்றது “ஒள்ளிய தும்மல்,” என்றமையின் நன்னிமித்தம் எனலாயிற்று. )
இங்குள்ள குறட்பாவில் தொடங்கிய தும்மல் நின்றுவிடுகிறது. தலைவன் வினை முடிந்து திரும்புதல் வேண்டும். தலைவன் வினை முடிவது போல் தோன்றி முடியாமல் நீடித்துக் கொண்டு செல்லுதலால்தான் வராமல் இருக்கின்றார் என்று ஆறுதலடைகின்ற வகையில் இப்பாடல் அமைந்துள்ளது.

'சினைப்பது போன்று' என்பதன் பொருள் என்ன?

'சினைப்பது போன்று' என்பது உண்டாவது போல அல்லது அரும்புதல் போல என்ற பொருள் தருவது. வருவது போல், எழுவது போன்று, உண்டாவதுபோல, வருமதுபோல என உரையாளர்கள் இத்தொடர்க்குப் பொருள் கூறினர்.

'சினைப்பது போன்று' என்பதற்கு உண்டாவதுபோல என்பது பொருள்.

என்னை நினைப்பார் போன்று நினைக்க மாட்டாரோ? அதனால்தான் தும்மல் உண்டாவதுபோலத் தோன்றிப் பின் உள்ளடங்கிவிடுகிறது என்பது இக்குறட்கருத்து.



அதிகார இயைபு

வந்த தும்மல் நின்றுவிட்டதே என்ற நினைந்தவர்புலம்பல் பாடல்.

பொழிப்பு

என்னை நினைப்பார் போலக் காட்டி நினைக்க மாட்டார் போலும்; அதனால்தான் தும்மல் வருவதுபோல தோன்றி நின்றுவிடுகிறது.