இத்தளத்துள் தேட...

செல்க: முகப்பு |

குறள் எண் 0071



அன்பிற்கும் உண்டோ அடைக்கும்தாழ் ஆர்வலர்
புன்கணீர் பூசல் தரும்

(அதிகாரம்:அன்புடைமை குறள் எண்:71)

பொழிப்பு: அன்புக்கும் அடைத்துவைக்கும் தாழ் உண்டோ? அன்புடையவரின் சிறு கண்ணீரே (உள்ளே இருக்கும் அன்பைப்) பலரும் அறிய வெளிப்படுத்திவிடும்.

மணக்குடவர் உரை: அன்பினை யடைக்குந்தாழுமுளதோ? அன்புடையார் மாட்டு உளதாகிய புல்லிய கண்ணின் நீர்தானே ஆரவாரத்தைத் தரும்.

பரிமேலழகர் உரை: அன்பிற்கும் அடைக்கும் தாழ் உண்டோ - அன்பிற்கும் பிறர் அறியாமல் அடைத்து வைக்கும் தாழ் உளதோ?; ஆர்வலர் புன்கணீ¦ர் பூசல் தரும் -தம்மால் அன்பு செய்யப்பட்டாரது துன்பம் கண்டுழி அன்புடையார் கண்பொழிகின்ற புல்லிய கண்ணீரே உள்நின்ற அன்பினை எல்லாரும் அறியத்தூற்றும் ஆதலான்.
(உம்மை சிறப்பின்கண் வந்தது. ஆர்வலரது புன்மை. கண்ணீர்மேல் ஏற்றப்பட்டது. காட்சியளவைக்கு எய்தாதாயினும் அனுமான அளவையான் வெளிப்படும் என்பதாம். இதனால் அன்பினது உண்மை கூறப்பட்டது.)

நாமக்கல் இராமலிங்கம் உரை: அன்பு என்பது மூடிவைக்க முடியாத உணர்ச்சி. ஒருவர் அன்புடையவர் என்பதை அவர் பிறருடைய துன்பத்தைக் கண்டு நம்மையறியாமலும் கண் கலங்குவதே காட்டிவிடும்.


பொருள்கோள் வரிஅமைப்பு:
அன்பிற்கும் உண்டோ அடைக்கும் தாழ் ஆர்வலர் புன்கணீர் பூசல் தரும்.


அன்பிற்கும் உண்டோ அடைக்கும்தாழ்:
பதவுரை: அன்பிற்கும்-உள்ள நெகிழ்சிக்கும்; உண்டோ-உளதோ; அடைக்கும்-அடைத்து வைக்கும்;; தாழ்-தாழ்ப்பாள்.

இப்பகுதிக்குத் தொல்லாசிரியர்கள் உரைகள்:
மணக்குடவர்: அன்பினை யடைக்குந்தாழுமுளதோ?
பரிதி: அன்பு மனத்திலே இருந்தால் அதனைப் புறத்திலே புறப்படாமல் அடைக்கும் தாழும் இல்லை;
காலிங்கர்: நெஞ்சினால் ஒருவர்மாட்டு ஒருவர் அன்புடையராயின் மற்றதற்கும் உண்டோ பயன்படாமல் அடைப்பதோர் கருவி;
பரிமேலழகர்: அன்பிற்கும் பிறர் அறியாமல் அடைத்து வைக்கும் தாழ் உளதோ?.
பரிமேலழகர் குறிப்புரை: உம்மை சிறப்பின்கண் வந்தது.

'அன்பினை அடைக்கும் தாழும் உளதோ?' என்றபடி பழம் ஆசிரியர்கள் இப்பகுதிக்கு உரை நல்கினர்.

இன்றைய ஆசிரியர்கள் 'அன்புக்கும் அடைப்பு உண்டோ?', 'அன்பிற்கும் அடைத்து வைக்கும் தாழ்ப்பாள் உண்டோ?', 'அன்பினை அடைத்து வைக்குந் தாழ்ப்பாளும் உண்டோ? (இல்லையென்பது கருத்து)', 'பிறர் அறியாமல் அடைத்து வைக்கும் தடை அன்பிற்கும் உளதோ? இல்லை.' என்ற பொருளில் உரை தந்தனர்.

அன்புக்கும் அடைப்பு உண்டோ? என்பது இப்பகுதியின் பொருள்.

ஆர்வலர் புன்கணீர் பூசல் தரும்:
பதவுரை: ஆர்வலர்-அன்புடையவர்; புன்-துன்பம்; கணீர்-கண்(ணில் பெருகும்) நீர்- பூசல்-ஆரவாரம்; தரும்-கொடுக்கும்.

இப்பகுதிக்குத் தொல்லாசிரியர்கள் உரைகள்:
மணக்குடவர்: அன்புடையார் மாட்டு உளதாகிய புல்லிய கண்ணின் நீர்தானே ஆரவாரத்தைத் தரும்.
பரிப்பெருமாள் கருத்துரை: அன்பு என்பது யாதோ என்றார்க்கு அன்புடையார்மாட்டுக் கண்ணீர் தோன்றும். அதனானே, அறிந்து கொள்க என்றவாறு. இதனானே இன்பத்திற்கும் இயைந்தவாறு கூறினார் என்று கொள்ளப்படும்..
பரிதி: அன்பு இருந்த இடம் கண்ணீர் காட்டிக் கொடுக்கும் என்றவாறு.
காலிங்கர்: அதனால் ஒருவர்மாட்டு உள்ளத்து விருப்பமுடையவரது மென்கண்மை தானே பலரறியும் பூசலைத் தரும் என்றவாறு.
காலிங்கர் குறிப்புரை: பூசல் என்பது விசேஷம். புன்கண் என்பது கிருபை. கண்ணீர் என்பது பெருமை..
பரிமேலழகர்: தம்மால் அன்பு செய்யப்பட்டாரது துன்பம் கண்டுழி அன்புடையார் கண்பொழிகின்ற புல்லிய கண்ணீரே உள்நின்ற அன்பினை எல்லாரும் அறியத்தூற்றும் ஆதலான்.
பரிமேலழகர் கருத்துரை: ஆர்வலரது புன்மை. கண்ணீர்மேல் ஏற்றப்பட்டது. காட்சியளவைக்கு எய்தாதாயினும் அனுமான அளவையான் வெளிப்படும் என்பதாம். இதனால் அன்பினது உண்மை கூறப்பட்டது..

'அன்புடையார் கண்பொழிகின்ற புல்லிய கண்ணீரே உள்நின்ற அன்பினை எல்லாரும் அறியக் காட்டும்' என்றபடி பழைய ஆசிரியர்கள் இப்பகுதிக்கு உரை கூறினர். பரிமேலழகர் 'தம்மால் 'அன்பு செய்யப்பட்டாரது துன்பம் கண்டுழி' என்பதை வருவித்து உரைத்தார்.

இன்றைய ஆசிரியர்கள் 'அன்புடையவர் கண்ணீரே உள்ளத்தைக் காட்டிவிடும்', 'அன்புடையார் படும் துன்பத்தால் ஒருவர்க்குத் தோன்றும் கண்ணீரே அவரது அன்பினை எல்லாரும் அறியக் காட்டிவிடும்', 'அன்பிற்குரியாரது துன்பங் கண்டபோது அன்பர்களுடைய கண்கள் பொழிகின்ற சிறுமையான கண்ணீரே (அன்பினை மறையாத வண்ணம்) அதனை எல்லாரும் அறியச் செய்யும்.', 'அன்புடையார் சொட்டும் சிறு கண்ணீரே உள்ளத்தில் கொண்ட அன்பின வெளிப்படுத்திவிடும்' என்றபடி பொருள் உரைத்தனர்.

அன்புடையாரின் சிறிய கண்ணில் தோன்றும் நீர்ப்பெருக்கே உள்ளத்தில் கொண்ட அன்பினை ஆரவாரத்துடன் வெளிப்படுத்திவிடும் என்பது இப்பகுதியின் பொருள்.

நிறையுரை:
அன்பு செய்யப்பட்டார் துன்பம் உறுதலைப் பொறுக்கமாட்டாமல் அன்புடையார் கண்ணீரும் கம்பலையுமாய் ஆகிவிடுவர்.

அன்பினை அணைபோட்டுத் தடுத்து வைக்கத் தாழும் உளதோ? அன்பால் முதிர்ந்தாரின் புன்கணீர் பூசல் தரும் என்பது பாடலின் பொருள்.
'புன்கணீர் பூசல் தரும்' என்றால் என்ன?

அடைக்கும் என்ற சொல் அடைத்து வைக்கும் என்ற பொருள் தரும்.
ஆர்வலர் என்பது முதிர்ந்த அன்புடையார என்று பொருள்படும். அன்பீனும் ஆர்வமுடைமை என்ற வள்ளுவரே மொழிந்துள்ளதால் அன்பின் முதிர்ச்சியே ஆர்வம் என்றாகிறது. ஆதலின் ஆர்வலர் என்பதற்கு 'அன்பால் முதிர்ந்தார்' என்றலே பொருத்தம் என்பார் தண்டபாணி தேசிகர்.

அன்பு என்பது உறவு, நட்பு முதலான தொடர்புடையார்கண் விளைவது. அன்பு செய்யப்பட்டாரைக் கண்டபோதோ, அவரை நினைக்கும் போதோ அல்லது அவர் பற்றிய செய்திகளைக் கேட்கும்போதோ அன்புடையார் கண் கலங்குவர். கண்ணில் பெருகும் நீரைக் கட்டுப்படுத்த முயன்றாலும அது அவர் அறியாமலேயே உடைத்துக் கொண்டு வெளியே தோன்றும். அவர் வடிக்கும் கண்ணீரே அவர் அன்புடையவர் என்பதை உரக்கச் சொல்கிறது. அன்பு என்பது அடைத்து வைக்க முடியாத உணர்ச்சி; அது கண்ணீராக வெளிப்படுகிறது.

நீர்த்தேக்கங்களில் மதகு என்னும் நீர் வடிவுப்பகுதி உண்டு. அதைக் கதவு (பலகை) கொண்டு தாழிட்டு வைப்பர். தேவையானபோது மதகைத் திறந்து நீரைப் பயன்படுத்திக்கொள்வர். தாழைத் திறந்து விடும்போது மதகு வழியாக நீர் விரைந்து இரைச்சலுடன் ஓடிவரும்.. நீர் வெளியே வரும் வழியை அடைத்தல் இயலும். ஆனால் உள்ளத்திலுள்ள அன்பு தானாகவே வெள்ளமாகக் கண்கள்வழி வெளிவரும்; அதைத் தாழிட்டு அடைத்து வைக்கமுடியாது. .

இக்குறளில் அன்புப் பெருக்கும் அதன் வெளிப்பாடும் சொல்லப்படுகின்றன.
பரிப்பெருமாள் என்ற உரையாசிரியர் 'அன்பு என்பது யாதோ என்றார்க்கு அன்புடையார்மாட்டுக் கண்ணீர் தோன்றும். அதனானே, அறிந்து கொள்க என்றவாறு. இதனானே இன்பத்திற்கும் இயைந்தவாறு கூறினார் என்று கொள்ளப்படும். என இக்குறளை விளக்குவார்.
அன்பைக் காண முடியாது. இங்கு அன்பிற்குத் தரப்பட்ட உருவம் அல்லது அடையாளம் கண்ணீர் ஆகும். தம்மால் அன்பு செய்யப்பட்டாரை நீண்டகாலத்திற்குப்பின் காணும் போது முகம் மலர்ந்து மகிழ்ச்சியில் கண்ணீர் வரும். அதுபோலவே அவர்க்கு ஏதேனும் இடர் வந்தபோது அது தமக்கே வந்தது போல நினைந்து வருந்தி கண்ணீர் சிந்துவர் அன்பின் வெளிப்பாடே கண்ணீர்.

அடைக்கும் தாழ், புன்கண் நீர், பூசல் முதலிய சொற்கள் ஆளப்பட்டதை நோக்கின் அன்பின் முதிர்ச்சி கொண்ட ஒருவருக்கு மிகவும் விருப்பப்பட்டவர் இவ்வுலகில் இருந்து மறைந்த சமயம் அதாவது இறநத வேளை அத்துன்பம் தாங்கமாட்டாமல் அவர் விடும் கண்ணீரும் கம்பலையும் நம் நினைவுக்கு வரலாம்.

'புன்கணீர் பூசல் தரும்' என்றால் என்ன?

புன்கண் என்பதற்கு புல்லிய கண் அதாவது சிறிய கண் என்று ஒரு பொருளும் துன்பம் என்று மற்றொரு பொருளும் உண்டு. எனவே புன்கணீர் என்பதை புன்கண்+ நீர் என விரித்து 'சிறிய கண்ணில் தோன்றும் நீர' அல்லது 'துன்பத்தால் தோன்றும் நீர்' என இரு திறமாகப் பொருள் கொள்ளமுடியும்.
ஒருவர்க்கு கண்ணீர் வரும்போது கண் சிறுத்துவிடும். வெளிவரும் கண்ணீரைத் தடுப்பதற்காகவே கண் சுருங்குகிறது. அன்புள்ளம் கொண்டவர்கள் கூடும்பொழுது அன்புப் பெருக்கால் அச்சிறு கண்வழியே கண்ணீர் உடைத்துக் கொண்டு வெளிவருகின்றது. இது இன்பக்காலத்திலும் துன்பக்காலத்திலும் தோன்றக்கூடியது என்றாலும் அன்பு வெளிப்படுவது அன்பு செய்யப்பட்டார் துன்புறும்பொழுது பெரிதும் நிகழ்வது.
பூசல் தரும் என்றதற்கு ஆரவாரத்தை உண்டாக்கும் அல்லது உரத்துச் சொல்லிவிடும் என்று பொருள் கொள்வர். 'பூசல் தரும்' என்பது உள்ளத்தில் தோன்றும் பொருதலையும் ஆரவாரத்தையும் குறிக்கின்றன. அன்பு செய்யப்பட்டார் தொடர்பான செய்தி கேட்டபோதோ அவரைக் காணும்போதோ அன்புடையார் உள்ளத்தில் தாமாகத் தோன்றும் படபடப்பையும் சலசலப்பையும் பூசல் என்ற சொல் விளக்கும். அன்புடையாரின் கண்ணீர் ஆர்ப்பரித்து வெளிவருவதே புன்கணீர் பூசல் தருவதாகும். மதகு திறக்கப்படும்போது எவ்விதம் நீர் வீறுகொண்டு ஆரவாரத்துடன் பாய்கிறதோ அதுபோல அன்புள்ளம் கொண்டோர் உள்ளத்தில் பூசல் உண்டாக்கிய அன்புநீர் சுருங்கிய சிறிய கண்கள் வழியே பெருக்குடன் வெளியே வரும்.

அன்பை அணை போட்டு தடுக்க முடியுமா? அன்புடையாரின் சிறிய கண்ணில் தோன்றும் நீர்வெள்ளம் உள்ளத்தில் உண்டான ஆரவாரத்தைத் தெரிவிக்கும் என்பது இக்குறட்கருத்து.



அதிகார இயைபு

அன்பு செய்யப்பட்டார் மாட்டு ஒருவர் வடிக்கும் கண்ணீர் அவர் அன்புடைமை கொண்டோர் என்பதை உரக்கச் சொல்லும் என்னும் பாடல்.

பொழிப்பு

அன்புக்கும் அடைத்து வைக்கும் தாழ்ப்பாள் உண்டோ? அன்புடையாரின் சிறிய கண்ணில் தோன்றும் நீர்ப்பெருக்கு (உள்ளத்து) ஆரவாரத்தைத் தெரிவிக்கும்.